He Examination tluang taka neih a nih theih nana mawhphurhna nei tura ruat te’n an tihtur tha taka an hlen theih avangin Commission chuan lawmawm a ti a. District hrang hranga Deputy Commissioner leh a thawhpuite, he examination neihna hmun Institution hrang hrang hotute, venhimna hna thawktu Police lam te, Exam duty tura ruat sawrkar hnathawk group level hrang hrangte, an thu leh hla puan zar sak thintu, Information & Public Relations Department leh he Examination tluang taka neih a nih theih nana tha leh ngaihtuahna sengtute zawng zawng chungah Commission chuan lawmthu a sawi a ni.

Tun tuma Preliminary Examination neih hi Mizoram Civil Services (Combined Competitive) Preliminary Examinations neih tan hun, kum 2012 atanga chhiarin a tum 11-na chiah a ni a, kum 2019-2020 leh kum 2020-2021-ah te Covid-19 hripui leng avangin he Examination hi buatsaih theih a ni lo. Kumin hian kum dang zawng aiin Candidate attendance a tha a, he hna diltu zat atanga chhutin a pumpuiah 76.54% in Exam an bei tluan a, hetiang taka attendance tha hi kum hmasa lama Preliminary Examination-ah a la awm ngai lovin, Commission tan thil chhinchhiahtlak tak a ni, MPSC chuan a ti.